افتح قلبى عشان اصلى

يارب ادينى المحبة اللى اقعد بيها معاك متحرمنيش من الكلمة الكويسة معاك افتح قلبى عشان اصلى انا معرفش اصلى ادينى انت يارب عشان اصلى علمنى انت زى ما التلاميذ قلولك علمنى نصلى خلى روحك القدوس يعمل فيا يتكلم على لسانى خلى نعمتك تشعلنى ادينى رعدة ادينى قعدة معاك ادينى خلوة معاك عودنى ان اصلى من اجل كل الناس اللى انا نسيتهم ادينى اصلى من اجل كل الاشخاص اللى انا بدينهم فى قلبى وفى فكرى واصلى من اجل الذين اللى سودت سيرتهم فى نظرى يارب غير قلبى متخليش العداوة تدخل فى قلبى يارب صفى قلبى من ناحيتهم وحنن قلبى عليهم وحنن قلوبهم عليا انا عايز اصلى اليك من قلب نقى علشان تبقى صلواتى مقبولة اليك انا بعترف امامك انى فيا العيب دة شيلة انت منى نجينى من خطيتى يارب مش عايز اسيبك غير لما تخلصنى من خطيتى ارحم ضعفى يارب وارحم جهلى وارحم عجزى ادينى قوة يارب