مــــــــــــــــدى الخصــــــوصيه بين اى مخطوبين او متزوجين و كيفيه التعــــامل مع اى انســــان فضولى كثير الاسئــله والتطفل

*مــــــــــــــــدى الخصــــــوصيه بين اى مخطوبين او متزوجين ؟؟؟؟

المفروض انكم متحكوش فى اى حاجه حصلت بينكم لاى حد
حتى ولو كان الحد ده اهلك ! او اصحابك !! او اى حد !!!

ايه اللى بيخلينا ممكن نحكى لاى حد على تفاصيل او خصوصيات بين خطيبى او زوجى ؟؟؟؟

1- ممكن خطيبتك تعمل حاجه تضايقك او تقول حاجه تضايقك فأنت بتبقى مخنوق ومحتاج تتكلم مع حد
فبتروح تتكلم مع اهلك او حد من اصحابك
نصيحه : حتى لو كنت مخنوق من خطيبتك اتكلم معاها هى قولها انا مضايق من كذا وكذا وكذا

2 - ممكن تلاقى ان خطيبتك زعلت منك فى حاجه وانت شايف انك مغلطش فتروح رايح تسأل اهلك او اصحابك
هل اللى انا عملته ده غلط ؟؟؟؟؟؟
نصيحه : بلاش تروح تحكى لحد واتكلم مع خطيبتك شوف انت زعلتها ولا لا واتناقش معاها

3 - بلاحظ بعض البنات المخطوبين بيبقوا عاوزين يغيظوا اصحابهم اللى مش مخطوبين
فطول اليوم تفضل تحكى ده انا خرجت مع خطيبى وهزارنا واتكلمنا فى كذا كذا وكنا مبسوطين .
نصيحه : بلاش الكلام الفاضى ده

4 - فى بنات اتعودت انها تحكى لاصحابها او مامتها على كل حاجه حصلت فى يومها
فتروح تحكى لمامتها او صاحبتها عن الكلام اللى ما بينها وبين خطيبها من غير ما تقصد
وخطيبها لو عرف ممكن يضايق
نصيحه : لو انتى اتعودتى انك تحكى كل حاجه حصلت فى يومك فخلى فى حياتك بعض الخصوصيه وبلاش تحكى كل حاجه

كيفيه التعــــامل مع اى انســــان فضولى كثير الاسئــله والتطفل .؟؟

ساعات مبيبقاش فضول ولكن بيبقى اطمئنان من الاهل بيسألوا عشان يعرفوا انتو كويسين ولا لا
فبيبقى الرد هنا لازم يكون رد يطمنهم تمام - الحال زى الفل كده يعنى

ساعات بقى ممكن يكون فى فضول من الاهل زى بتتكلموا فى ايه ؟؟؟؟؟؟
هنا الرد بيكون عادى او مش لازم تعرفوا على فكره بس تكون بطريقه لطيفه
ومره فى مره فى مره هيزهقوا ومش هيسألوا تانى

احيانا بقى بيكون تطفل من الناس اللى حوالينا
فى الحاله ديه اوعى تقول/ى اى حاجه
لان الناس اللى بتبقى فضوليه كده بتبقى عاوزة تعرف عشان تعرف الناس كلها
فالرد هنا بيكون مباشره ( مش هينفع ارد ديه خصوصيه - معلش ده سؤال خصوصى - اى رد يصد سؤال الشخص اللى قدامك )
ومدام رديت عليه مره كده .... هيتحرج واستحاله انه يسأل تانى

ملحوظه : ساعات البنت لما بتتخطب بتبقى محافظه على خصوصيات خطوبتها ومش بتحكى حاجه لاصحابها
اصحابها بيتغيروا من ناحيتها وبيقولوا عليها انها اتغيرت من ساعه ما اتخطبت عشان مش بتحكى حاجه عن خطيبها
اوعى تزعلى منهم الموضوع عادى واوعى برضوا تحكيلهم خليكى طبيعيه معاهم ومع الوقت هما مش هيقولوا عليكى كده
وفى نفس الوقت هياخدوا انك مش بتحكى عن حاجه عن خطوبتك

» كيفيه نعالج مشكلة السرقة عند المخدومين